łżë. 21, 2010 / Dopòwiesców (6) / hana ò 10:45 dp
rozjëmóm skrzidła jak òracje
rozpòscéróm deklamacjã
na tczã akacjowi Gracji
jakô nie bòji sã halucynacji
jak wpôdóm przez jómã
ùmësłu w hermeticzny krąg
òmanów pòmianów jazni
Gracja jak akacjô skłóniô sã
nade mną nad kòlibką
bibką bezbrónnoscë òbłãdny
jak narôz przestąpiã grańce
realnoscë bëtu baletu żëwëch
Gracja niese mie na remiónach
jak atleta na Błãkitną Planétã
bawimë sã razã w piôskòwnicë
i nie gôdô ò mie czarznica
cëdownica tak jak jiny dzecë
mògã spòntanno pòpłakac
Gracja zaczinô ze mną płakac
gôdóm ji ò wëdżibłoscach
ùmësłu òbłąkónégò jak chléw
òna słëchô jak dobrô drëszka
mieszka na pòdwòrzô mëszlów
wëmësłów fantazji nieòdgadłi
dzãkùjã tobie Gracja za kreacjã
mòjëch wëmësłów niedomësłów
na òceanie rozmieniô ùmësłu
móm dlô cebie w czeszeni pistacjã
z wdzãcznoscą na grandolinie grajã
pòeticką gòticką ariã cebie glorifikacjã
Òpùblikòwóné jakno: Kùńszt Artiznë
łżë. 20, 2010 / Dopòwiesców (3) / hana ò 10:55 dp
nôbarżi móm stracha drëdżégò człowieka
że codzéń robi sądë òstateczné kònieczné
tak bôjeczné jak czerwiony kapturk w trôwie
jak pawión w krzeszniowim sadze ò zôpadze
wieczné brzątwienié rojenié mielenié
chtos na trąbie trąbi swiatu klëkã niwekã
że nie jedurną jem kroplą wòdë w òceanie
le jô to pòkórno wiém wiôldżi panie
że jem w hierarchiach mrówka sznërówka
bùksówka môłô krówka zbòżówka
sniã cobë ùceknąc do brata półswiata z te swiata
gdze człowiek człowiekòwi wôłkã wszechwôłkã
chcã stac sã kwiatowim pëłkã arcëbòskoscë mòtilkã
co seje niepòkalóną pòchwôlóną miodnosc pògòdnosc
jak niebiańskô miewa różewô jak ewa
bëm chca wëlecec bùten grańców lëdzkòscë
w skrëtoscë schòwac sã tam gdze dzëwé łabãdze
Òpùblikòwóné jakno: Kùńszt Artiznë
łżë. 17, 2010 / Dopòwiesców (4) / hana ò 10:47 pp
w mòjim chléwie móm fejn swiniã
metafizyczną swiniã filozoficzną
swiniã arcëbùczkã grażinã
co skôcze jak trampòlina
i sklonujã sobie swiniã
swiniã wiôlgą jak pùstiniã
mdze miec swinia swą sostrziniã
bò jô baro lubiã bùczczi
i jich swiãté chléwné wnuczczi
mdã miec swińsczé klonë
klonë pëszné jak napòleònë
klonë w dłóniach sã mieszczący
metafizyczi szëkający
jak klonëjã mòje swinie
to so gróm na grandolinie
spiéwë chléwné swińsczé
gbùrsczé klimatë arómatë
mùzykã rëczącą rikającą
w chléwie sã nachadającą
jem ùmësłã klonotwórczim
artistą gnato i krëwio ùtwórczim
lëdóm was klonë chléwné
mòje môłé swińczi dzywné
lubiã was klonë czerwioné balonë
przejrzesto ùroczësto tobaczësto
swińsczi rodzynczi swińsczi mùminczi
pòjta do mie klonë – do swòji maminczi
wiérzta przërëchtowónô jakno dodôwk do nôùkòwi prezentacji na bioetikã
Arnaud – Buglers Dream
Òpùblikòwóné jakno: Kùńszt Artiznë
łżë. 14, 2010 / Dopòwiesców (8) / hana ò 7:27 pp
Òpùblikòwóné jakno: Z negò swiata
łżë. 14, 2010 / Dopòwiesców (7) / hana ò 3:25 pp
CHÒC JEM BEZWSTIDNÔ BEZWZGLÃDNO
BEZSROMÒTNÔ JAK GÃS BEZ PIÓRÓW
I W KÒŻDIM SŁOWIE NAGÔ JAK ADÓM
W CAŁOSCË SÃ WSTIDZÃ ŻE JISTNIEJÃ ŻE ŻËJÃ
ÙCEKNÃ ZE SWIATA TAK CHÙTKÒ JAK GEPÔRD
BË SCHÒWAC SÃ W KAFTANIE NIEJISTNIENIÔ
ÙKRËC JAK SROMÒTNÔ JAGÓDKA PÒD KRZÃ
CHCÃ BËC TAKĄ JACZI NICHT NIE ÒDNALÉZE
W SWIATOWI ZÔBAWIE W CHÒWÓNÉGÒ
NIE CHCÃ COBË CHTOS DOSŁOWNO ÒBÔCZIŁ
ŻE RÓWNAK JEM W SWIECE TIM SAMIM CO ÒN
JE MIE GŁËPASO ŻE JÔ RÓWNAK EGZYSTËJÃ
REALNO DÉRËJÃ BËTËJÃ BEZWÔRTNO JAK KAM
NACHÔDÓM SÃ NA PÒLACH NY RËMI ZEMI
CHÒC LËDZE I TAK MIE WËRZËCËLË WËKLUCZËLË
Z KARNA DOSC NORMALNËCH KAMIENIÓW
PÒMÒDLÃ SÃ Ò SMIERC PÒCESZICELKÃ
DO JANIOŁA STRÓŻA Z BÒSCZÉGÒ PÒDWÒRZÔ
LE NIE WIÉM CZË MÓM FÙL PRAWÒ MÒDLENIÔ
BË BEZWSTIDNO JANIOŁOWI PÒKAZAC
MÒJĄ BEZGRANICZNĄ PSYCHICZNĄ NAGÒSC
WËMÓWIC NÔGÒRSZÉ GRZÉCHË NIEBËCÔ W SE
RZEKNÃ ŻE MÓM BEZWSTIDNĄ PSYCHIKÃ ÒHIDNĄ
BRZIDZÃ SÃ WSTIDZÃ MÒJÉGÒ BËCÔ W SWIECE
DZEWICZĄ CALINECZKĄ CHCÃ BËC W KWIECE TËLPË
Òpùblikòwóné jakno: Kùńszt Artiznë
łżë. 13, 2010 / Dopòwiescë (0) / hana ò 8:29 pp
chlewizna to rówizna mieszkeńców jimmanentno
pòczëstëch przejrzëstëch czëstëch
kùrczątkò jagniątkò gôpiątkò diôblątkò
òtmikô sã ùmësł i wchôdôsz w chléwné jómë
brómë òtmikô absolutnô swinia i gòtickô krowa
widzysz pòla gnojowé i kôł ksążicowò robaczësti
w kalëszczu sedzy karno biôłëch òwców ùsmiéwców
slimak zjédô czekòladową kùpã jak zupã
kùrë robią kòncertë tak genialné w swiãto parafialné
że gówno wkłôdôsz w ùszë jak watã aùtomatno
mëszë na zeslu ùdôwają jinteligentné personë
warnë straszą głupé jak bótë marné sarnë
bò chléw je zwierzãcym swiniarztwã skòtlónym
ùtólónym do gówna zybòtã egzystencji
Òpùblikòwóné jakno: Kùńszt Artiznë
łżë. 13, 2010 / Dopòwiescë (0) / hana ò 4:27 pp
a mòże filozofiô sã zmilëła zbłądzëła
czej wëkluczëła z westrzódka sebie
drãgòsc transgresjów niejistnieniô
òna chce zgrôwac do realnégò
w swiece szëkô kwiatów prôwdë
òdwieczny bezzmiłkòwòscë zmësłów
filozofiô ni mô sympatii empatii
dlô fatamòrganów halucynacjów
òmamów bez skrëchë nie ùznôwô realno
emòcjonalno przeżëtëch mòżlëwëch swiatów
z czësto logicznym bezkriticznym ùsmiéwkã
wëłącziła wszëtczé schizofreniczné bëtë
w brutalnym zamroczenim mentalnym
roztrzôskała dëszë chòrëch na dëszë filozofów
bò schizofreniô nie rozmieje filozofòwac
to grzesznica nie ùmie ùkòchac mądrotë z miłotë
wënëkónô mùszi szëkac schrónieniô jistnieniô
w bezfilozofnym bestialsczim swiece
Òpùblikòwóné jakno: Kùńszt Artiznë
łżë. 10, 2010 / Dopòwiesców (17) / hana ò 8:24 pp
chlewizna nie je takô òbarchniałô
jak mëszli człowiek niedomëslôk môłi
wchôdôsz pò drôbce czekawòscë
na blónã wëmëszlajkã i òbaczisz
chëcze w kùrpach chòdzący na pôlcach
i górã wątłą wiszącą na hôkù
z nieba spôdają pòwrózczi jak nóżczi
żirafë dzëwò tuńcëją ze słuńcã
pląs chlewiznë egzotiznë
przë zwãkach grandolinë
bez winë ùsmiéwô sã trôwa
z lëtewką kònewką marchewką
całi chronotop wëdżibłi jak chléw
òbarchniałi klasyczno metafizyczno
chùr swiatów mòżlëwëch spiéwô
piesniã na czesc marchewków
Òpùblikòwóné jakno: Kùńszt Artiznë
łżë. 9, 2010 / Dopòwiescë (0) / hana ò 8:59 pp
stôwóm sã chaòsã w czôrnëch łatach gnatach
bigòsã wseczëców i mëszlów jak blewiązków
rozzybónëch na dżiblówce egzystencji
„jô” roztrzaskóné na dzélczi
ni ma ju czegò szëkac na zemi
swiat lëdô spójné kònstrukcje
rekònstrukcje „egò” nie dôwają gwësnoscë
dlô zemian jô bëła nieprôwdzëwô i nie wiém
czë jem prôwdzëwô w tim chaòticznym wëdżibie
mòże za sztërk stanã sã łżélstwã zemi
jô nie chcã chòc sztótama chcã serdeczno
przesąsc sã na jiną planétã z filozofama
zatuńcowac janielskò na swiãtim mòlo
jak wczora zawczora bëło mie w ùmëslë jinaczi
mòże jô nie jem psychiczno chòrô terô
to dérëje spik niedospóno chrapiã bùten swiata
a mòże jô prawie prawie jem òbarchnialcã w chaòsu
i swiat chce mie rzeknąc to diskretno
Òpùblikòwóné jakno: Kùńszt Artiznë
łżë. 8, 2010 / Dopòwiesców (2) / hana ò 5:05 pp
jeden dżad w tramwaju sadł
i gôdô sobie do mie tak:
nie wzérôj na mùchë
wzérôj na mùsk swój
bò jak mdzesz zdrza na mùchë
tej mùsk twój
bãdze widzôł mùchë
dzéwczã nie bãdzë slepô
òczë do górë i
wzérôj na mùsk swój
nie zdrzë na mùchë
bò jak mdzesz zdrza na mùchë
tej mùsk twój
bãdze widzôł mùchë
dżad z tramwaju wësadł
béł niewidzalny słabòrealny
Òpùblikòwóné jakno: Kùńszt Artiznë
