wëòbrazniô
pòłożił chtos na biurkù wëòbrazniã
zniesztôłconą ze strachù
zasztëkónô w dzecynny jizbie Schulza
bòjã sã karakònów
że wińdą narôz z pastą do zãbów
i wslizgną sã w jawernotã
móm stracha kònia z teatru Kantora
i tegò co miartwé że mòże bëc żëwé
że smierc je jawernô barżi jak żëcé
i pòtkómë sã czedës wszëtcë jakno ùmarłô klasa
„w królestwie wëòbrazni
je tak jak w paleòntologii”
absolut jak dinozaùr w kòpalni mësleniô
w szëfladach Bachelarda sedzącë
trzeba strachë wëòbrazni zniesztôłcëc
ritmiczno cynamònową jizdebkã òdtwòrzëc
jimaginacji procesjã wkół absolutu
włożoną w fòrmã człowieka materiã
w labirince antiwzniosłoscë zamknąc
ceremònialny fantazmat smiercë òswòjic
w bezszelestnym tuńcu z mòtilã
a jô – manekin w gwôsny òsobie wëòbrazni
złómiã òbsesjã fantomów nieòbecnoscë
wësniã pląs midzë aktama jestestwa
i zagróm absolutné artiznë jinterludium
Nen wpisënk òstôł dodóny w czw., 1, stë., 2009 ò 8:27 pp ë nalôzł sã w dzélu Kùńszt Artiznë. Mòżeta dozérac nen wpisënk dzãka pòwrózkòwi RSS 2.0. Mòżeta òstawic dopòwiesc , abò trackback ze swòji starnë.
Móm taczé filozoficzné naszpikòwóné najiwnoscą pitanié… Czë wëòbrazniô je dzélã absolutu, czë je pòza nim?
Ale fejnô sprawa, tej mòże żëczã Cebie w tim rokù maksymalnégò zblëżeniô do absolutu pòprzez kaszëbsczé ùtwórstwò:)
Dopòwiesc przez hana — stë. 1, 2009 @ 10:47 pp
z filozofnégò pòzdrzatkù wëòbrazniô je dzélã swiądë człowieka (chòc Jung gôdô téż ò nieùswiądniony wëòbrazni).
absolut je czësto bùten swiądë, niedosygłi – mòżna leno próbòwac sã do niegò zblëżëc… np. przez kùńszt, ale wiedno mdze to leno lëdzczé wëòbrażenié.
równak, chòc wëòbrażenié, to blëżi:)