***

kùńszt je absolutno bòską hòdowlą

dzëwëch słów na pòkójnym òceanie fòrmë

pisac mòżesz leno pòézjã metafizyczno pòwszédną

jak wpadniesz w artiznã

dosygnąc sufitu swiata pòza nieskòńczonoscą

a pòstrzédno wmiknąc w głãbinã przeżëwaniô

mógł leno Witkacy

na pòrtrece

Michôł Chòromańsczi na dłudżi szëji

absolutu ni mòżna dosygnąc

westrzód pejzażów wszechłgarstwa

że chtos dôł kòmùs przëtrôfkã żëcé

niech słowa òtulą dëchòwą pòscelą

sztócyk ùtwórczi w sztëczkù wiecznoscë

esteticzno niedopasowóny

niedowinny jak w główce kapùstë

absolut jidze na westrzódkù bëtu

bez sztôłtów lëdzczich samò w sobie żëcé

Òpùblikòwóné jakno: Kùńszt Artiznë

Nen wpisënk òstôł dodóny w wt., 3, stru., 2009 ò 9:01 pp ë nalôzł sã w dzélu Kùńszt Artiznë. Mòżeta dozérac nen wpisënk dzãka pòwrózkòwi RSS 2.0. Mòżeta òstawic dopòwiesc , abò trackback ze swòji starnë.

5 dopòw. »

Dopòwiesc przez Szadi — czer. 29, 2009 @ 11:07 pp

“niech słowa òtulą dëchòwą pòscelą

sztócyk ùtwórczi w sztëczkù wiecznoscë”

To znaczi, że słowa są leno przëkrëcym dlô ùtwrórstwa, czë jakòs tak, czims, co przëòzdabiô cos głãbszégò? Bò jakòs tak to rozmiejã.
Nã wiérztã jô ju móm czëtóné wiele razë, bò òd dłëdżégò czasu je òna slédnymn wpisënkã na Twòjim blogù. Nie piszesz, bò Jes ju dosygła Absolutu?
mieszny pòzdrówk
Shadi

Dopòwiesc przez hana — czer. 30, 2009 @ 1:00 dp

słowò nigdë ni mòże do kùńca òddac mëszleniô,
słowò je za słabé znaczënkòwò. tak pò prôwdze mëszlô nie dôwô sã ùchwëcëc na niżódën ôrt. pòézjô to wicy jak leno słowa, ale òna téż nie przekazywô mëszlë taką jaką mëszlô pò prôwdze je. słowa “tulą” to, co chcesz rzeknąc, ale nie gôdają do kùńca tegò, co mëszlisz. midzë mëszlenim a gôdanim je przepadniô.

Dopòwiesc przez hana — czer. 30, 2009 @ 1:06 dp

nie piszã, bò nicht nie dôł do tegò czasu kòmentarza do ti prawie wiérztë…
to znaczi, że abò z mòjim pisanim cos je nie w pòrządkù, abò z czëtińcã.
tak czë tak, ni mô szëkù dawac nick nowégò.
za wiele filozofiów móm w główie i nie mdze ju lżészich tekstów. në i mój
czerwińc – to 15 zdónëch egzaminów.

Dopòwiesc przez Szadi — czer. 30, 2009 @ 6:28 pp

Tej gratulëjã 15 egzaminów!
Z Twòjim pisanim wszëtkò je w pòrządkù, le widzec je, że òno sã pò prôwdze zmieniło. Je szëk dawac cos nowégò. Tak so wspòminóm te Twòje lżészé tekstë… fejn bëłë. Ale jeżlë zapisóné je Cë pisac w ten ôrt, tej biéj bez ùrzasu tą stegną.
A np. jô nie kòmentérowôł ti wiérztë, bò òna je dosc nielëtkô i jem miôł strach, że cos lëchò zjinterpretëjã ëtd.
A z tima słowama to dosc czekawô sprawa- òtulaąc mëszlã, czë wseczëcé mògą òddac jegò sztôłt, ale nie jidze przez nie pòznac farwë.

Dopòwiesc przez Mark — lëp. 2, 2009 @ 8:25 pp

Witôj Hana

Të napisa: nie piszã, bò nicht nie dôł do tegò czasu kòmentarza do ti prawie wiérztë…
to znaczi, że abò z mòjim pisanim cos je nie w pòrządkù, abò z czëtińcã.

Në jo, bò swiat je abò czôrny abò biôłi ;-)
Wiész, jô generalno to czëtóm wszëtkò co wa (nie Wa, le wa :-) ) piszeta (móm waji nowi tekstë/dopòwiescë ù ce w czëtôrzu pòwrózków RSS), le czë pò prôwdze je nót wiedno dôwaniô dopòwiesców do dobrich tekstów? Mòżesz bëc zycher tegò, że są òne czëtóné.
Sóm nie wiém dobrze, cëchòta je téż dopòwiescą ë chto wié, czë prawie w swòji czësti fòrmie nie nôlepszô. Dlô mie sómegò samô téma zamkniãcô w jak nôprostszi fòrmie jak nôwikszegò przekôzu stoi czësto z przódkù. Mało chto mô równak taczi dôrënk jakno të ë je w sztãdze zestôwic słowa tak do grëpë bë gôdałé wicy jakno to za czim z wierzchù wëzdrzą.

Pòzdrówczi

Mark

PS Rôczã do òbzéraniô òbrôzów mòjegò dobrégò drëcha, je to starna jaką móm mù zrëchtowóną – prawie czôrno na biôłim :-) http://www.human4art.de

PS 2 Ë jesz cos – të môsz wicy dopòwiesców ù se zebróné, jakno jô przez slédnych 8 lat ù se :-)

Dodôj dopòwiesc