Archiwùm gòd., 2007

jem astralnym całã

Òpùblikòwóné przez
hana
at gòd. 16, 2007 w Òglowô. 0 Dopòwiescë

jem astralnym całã

z kòsmiczny perspektiwë

pòzéróm

na fizyczné cało

mòje i noszã

z placu w plac

z materialnyma òczama

jaczé widzą òbrazë

z ùszama co czëją

fizyczné cało mòje

zdrzódlany òbrôz

etericzno widzã

z gwiôzdnégò pòzdrzatkù

jem astralnym całã

Mòja artizna

Òpùblikòwóné przez
hana
at gòd. 7, 2007 w Òglowô. 0 Dopòwiescë

Mòja artizna

Je czësto bënowô

Jak bënë szëfladë

Schòwónô

Jak robôczk w zemi

Je scësno chaòticznô

Je pòmachtónô i trzasłô

Jak kapùsta z grochã

Chaòticzno przërôbióm

Psychiczno demòntëjã

Talentë môłpë

Szãtopierzé skrzidło

Wkrãcył mie w klatë

Roczitnik z Roczicyn

Mój diôcheł artiznë

Bez krëwi i gnata

Ùprôwióm rolã

Fąfkòwatô artizna

Dzëwô kreatizna

aaaaa

Do ritmù tuńcëjã

Przë mrëkù kòta

Z artizną solã bót

I spiéwóm do nót

Fąfczi, wërgle, psotë

Artizna majestatnô

Kùńszt szpòrtownoscë

Mòc genialnotë

Ùtwórczi bëlnotë

Aùtentizna

Ekspòzycjô dëcha

Dërch dërchã

Impresjô mie

Ekspresjô mie

wiérzta nôdgrodzonô w XXII Òglowòpòlsczim Lëteracczim Kònkùrsu m. M. Strijewsczégò, 2007 r.

Marchwiowi Mùmaczu Straszkù mój…

Òpùblikòwóné przez
hana
at gòd. 7, 2007 w Òglowô. 0 Dopòwiescë

Marchwiowi Mùmaczu

Straszkù mój

Nôùczë mie môłczeniô

Artistnégò kùńsztu

Zazdrzeniô sã w mùchã

Z wiôldżima òczama

W majestatnégò wãdzëbôka

Czorgającégò pò zemi


Môłczący dżadu

Z marchwiowima zãbama

Ò môłczenié bënowé

Glingòtno brzëmiącé

Zwãk bùrczibasu

Proszã ce

Reno, wieczór, w dzéń i òb noc

Chcã czëc môłczenié


Chcã pòczëc gwôsny strach

W klasykòwim zwãczenim

I cëché mëslë pòkraczné

Wmëslëc sã w strëgã deszczu

W biôłosc zwónuszków

W pamiãtlëwòsc niezabôtczi

Kòchónô Marchewkò

Mòdlë sã za nama


Mùmaczu, Straszkù mój

Të wiedno przë mie stój

I dopùscë wsłëchac sã

W môłczenié twòje

Òno wëmòwné je jak rëba

Głosné jak wrzeszczenié

Òno nigdë nie zdradzy

Òno wszëtkò rzecze amen

wiérzta nôdgrodzonô w XXII Òglowòpòlsczim Lëteracczim Kònkùrsu m. M. Strijewsczégò, 2007 r.

Wierzã w Bòrową Cotkã i niedowinnosc

Òpùblikòwóné przez
hana
at gòd. 7, 2007 w Òglowô. 0 Dopòwiescë

Wierzã w Bòrową Cotkã

I niedowinnosc wôłków

Jô lasu stwòrzenié

Razã z miedwiedzã

Do Bòga sã mòdlã

Ò niedowinnosc pòwszédną

I òdpùscë nóm naje winë

Prôwdzëwą niedowinosc

Przezdrzélną jak zdrzódło

Niesczapóną jak drzéwiã

Czësti niedowink

Sadnął mie na rãce mòtilk

Przëczurpôł sã zajączk

Niech mdze Królestwò Cotczi

Na Janiół Pańsczi dzëcół klëwie

Zwãczi zwònuszk kwiôtuszk

I niedowinno ùrodzony

Błogòsławiony brzôd

Żëwòta Słowò w lasu

Bòrowô Cotka kroji chléb

Pòwszédną niedowinnosc dôj nóm

wiérzta nôdgrodzonô w XXII Òglowòpòlsczim Lëteracczim Kònkùrsu m. M. Strijewsczégò, 2007 r.