stru. 3, 2009 / Dopòwiesców (5) / hana ò 9:01 pp
kùńszt je absolutno bòską hòdowlą
dzëwëch słów na pòkójnym òceanie fòrmë
pisac mòżesz leno pòézjã metafizyczno pòwszédną
jak wpadniesz w artiznã
„dosygnąc sufitu swiata pòza nieskòńczonoscą
a pòstrzédno wmiknąc w głãbinã przeżëwaniô”
mógł leno Witkacy
na pòrtrece
Michôł Chòromańsczi na dłudżi szëji
absolutu ni mòżna dosygnąc
westrzód pejzażów wszechłgarstwa
że chtos dôł kòmùs przëtrôfkã żëcé
niech słowa òtulą dëchòwą pòscelą
sztócyk ùtwórczi w sztëczkù wiecznoscë
esteticzno niedopasowóny
niedowinny jak w główce kapùstë
absolut jidze na westrzódkù bëtu
bez sztôłtów lëdzczich samò w sobie żëcé
Òpùblikòwóné jakno: Òglowô
stë. 26, 2009 / Dopòwiesców (5) / hana ò 3:52 pp
Òpùblikòwóné jakno: Òglowô
stë. 4, 2009 / Dopòwiesców (3) / hana ò 3:00 dp
tuwò béł stółk
to nie béł stółk
jak bë béł stółk
tej bë béł tuwò
to bëła starka
tu pòłóż starkã
bò bëła starka
i gdze je starka
jidze procesjô
i maszerëją
i sëpią kwiatë
i grają trąbë
i niosą trëmë
i niosą krziżë
i jidą piechti
i jadą karą
ò zmiłowanié
proszą i proszą
i telewzérnik
niosą i niosą
i himn spiéwają
smieją sã głosno
za rãkã trzëmią
nogama kòpią
z artizną jidą
z toptuchã jidã
chaòs pòwszédny
dôj nama dzysô
Zymk 2008
Òpùblikòwóné jakno: Òglowô
stë. 1, 2009 / Dopòwiesców (5) / hana ò 8:27 pp
pòłożił chtos na biurkù wëòbrazniã
zniesztôłconą ze strachù
zasztëkónô w dzecynny jizbie Schulza
bòjã sã karakònów
że wińdą narôz z pastą do zãbów
i wslizgną sã w jawernotã
móm stracha kònia z teatru Kantora
i tegò co miartwé że mòże bëc żëwé
że smierc je jawernô barżi jak żëcé
i pòtkómë sã czedës wszëtcë jakno ùmarłô klasa
„w królestwie wëòbrazni
je tak jak w paleòntologii”
absolut jak dinozaùr w kòpalni mësleniô
w szëfladach Bachelarda sedzącë
trzeba strachë wëòbrazni zniesztôłcëc
ritmiczno cynamònową jizdebkã òdtwòrzëc
jimaginacji procesjã wkół absolutu
włożoną w fòrmã człowieka materiã
w labirince antiwzniosłoscë zamknąc
ceremònialny fantazmat smiercë òswòjic
w bezszelestnym tuńcu z mòtilã
a jô – manekin w gwôsny òsobie wëòbrazni
złómiã òbsesjã fantomów nieòbecnoscë
wësniã pląs midzë aktama jestestwa
i zagróm absolutné artiznë jinterludium
Òpùblikòwóné jakno: Òglowô
gòd. 27, 2008 / Dopòwiesców (2) / hana ò 6:59 pp
jak bë jô ùrodzëła sã
mëszą
żëcé mòje bëłobë
kriticzno krótczé
rozëm mój głëpszi bë béł
jak dłëgszi
a fantazje najiwné
tak primitiwné
że nigdë nie bëła bë jô
pòétką
a leno złodzéjką sera
a dzecë mòje téż
w dërżéniu
bëłëbë mëszama
co żëją
bez wòlë z mùszu
pòd miotlékama
Stegna 4/2008
Òpùblikòwóné jakno: Kùńszt Artiznë
séw. 27, 2008 / Dopòwiesców (8) / hana ò 4:05 pp
piszã pòézjã czëstą herezjã parnasu
szepczą cos do mie apòlla mùzë
a jô w liriczné zapinóm gùzë
dwa pòmidoré splesniałé
malujã mlékã skwasniałim
fùrmanów wòzë na niebie
diôchłów artizna jedze
złapiã pòézjã na błaznów wãdkã
wiérztë płënącé w mòrzim gnojowim
jak rëbë wpùszczã wgłãb sebie
roztopiã w mëslach jak kwiatë wiszniowé
z kùńsztã gróscama narwã piscama
w pôlcu serdecznym zgniotã miłotã
kwasną wezgódkã dzëwi jagódczi
zajączka łapką wôłczą jabłóniã rozkrojã
dogòniã letëwkã skrzidlatą i zgniotã
ùkòchóm wszëtczé mùchòmòrë
kùńsztowno zrobiã artistny akt etstazë
ùniosã pòézjã pònad herezjã
lira zamieszkô we mie pòkracznô
a jô pòétką bãdã dzëwaczną
Stegna 4/2008
Òpùblikòwóné jakno: Kùńszt Artiznë
séw. 11, 2008 / Dopòwiesców (3) / hana ò 5:31 pp
kòchóm wëchôdac
sobie z cała
i stawac sã
lëtewką
wòlno latac
pò swiece
bëc aùtenticzną
bez greńców
dëch mój bez cała
biegnie
Stegna 3 / 2008
Òpùblikòwóné jakno: Kùńszt Artiznë
zél. 7, 2008 / Dopòwiesców (2) / hana ò 12:33 pp
Marii Roszak
namaluj mie proszã
swinkã malinką
co chòdzy i nie znô
zaczim żëje
zaczim w bùchce
sobie chòdzy
bò teskniã za nią
chcã miec swòjską
swinkã z ògónkã
zakrãconym do górë
żebë żëła prôwdzëwô
jak swiat mëszlącô
nie wëmëszlonô
dlô kòritka ta swinka
Stegna 3/2008
Òpùblikòwóné jakno: Kùńszt Artiznë
lëp. 26, 2008 / Dopòwiescë (0) / hana ò 11:03 pp
wierzã w chaòs mùskù
i w chaòs nogów wierzã
w ùtwórczim zamëszlënkù
jidze sã z głową na kòlanach
z harmónią bënë dëcha
Stegna 3/2008
Òpùblikòwóné jakno: Kùńszt Artiznë
stru. 11, 2008 / Dopòwiesców (3) / hana ò 10:14 pp
spac baro lubiã
i lubiã jak we snie
przechôdają do mie
dëchë
nie bòjã sã
i lubiã dëchë cëzé
jak dëchã gwôsnégò
jak cało mòje spi
jô w nocë z nima
ùcékóm na wëżënã
nad chronotop pnã sã
i rosnã jak pòlny kwiat
w stronã słuńca
jem spiącą królewą
gwôsnëch mëszlów i snów
spac baro lubiã
i w spikù swiądno mëszec
i swiądno bëc w bezswiądnym
Stegna 1/2008
Òpùblikòwóné jakno: Kùńszt Artiznë
